Muri iki gihe u Rwanda ruri mu minsi ijana yo kwibuka jenoside yakorewe Abatutsi mu 1994, bimwe mu bigo byaba ibya Leta n’abikorera bikomeje gufata mu mugongo imiryango yabuze ababo muri jenoside, haba mu kwibuka no kubafasha kongera kwiyubaka nyuma y’ayo mahano yagwiriye u Rwanda.

Kuwa Gatanu w’icyumweru gishize nibwo AB Bank Rwanda nk’imwe muri banki z’ubucuruzi zikorera mu Rwanda, yasuye imiryango 19 y’abarokotse jenoside batujwe mu mudugudu wa Rudakabukirwa, mu Kagali ka Munini, mu Murenge wa Gikomero ho mu Karere ka Gasabo, itanga ihene kuri buri muryango n’ubwisungane mu kwivuza bw’umwaka wa 2018-2019.

Ubwo bufasha kandi bwaherejekwe n’inkunga y’ibiribwa bitandukanye yahawe iyi miryango.

Iki gikorwa cy’urukundo cyabimburiwe no gusangirira hamwe amafunguro aba bakozi bari bitwaje, cyabereye mu nzu mberabyombi y’Umurenge wa Gikomero.

Umuyobozi mukuru wa AB Bank Rwanda, Arah Sadava yabwiye aba baturage ko iyi banki ibazirikana, ishishikajwe no kubafasha gutera imbere no guharanira ko jenoside itazongera kubaho ukundi haba mu Rwanda n’ahandi hose ku Isi.

Yagize ati “Imyaka 24 irashize Jenoside yakorewe abatutsi ibaye, mu by’ukuri ni ibintu bigoye kubyakira ariko Abanyarwanda by’umwihariko n’Isi yose muri rusange tuzahora twibuka Abatutsi bayitakarijemo ubuzima, tubaha icyubahiro kibakwiye, tunafasha kwiyubaka abayirokotse ari no muri urwo rwego twaje kubasura”.

Yakomeje abizeza ko Banki ayoboye izakomeza kubaba hafi ifatanyije n’ubuyobozi bwiza bw’igihugu burangajwe imbere na Perezida Paul Kagame.

Abahawe iyi nkunga bashimiye cyane AB Bank kuko bajyaga bahinga bakabura ifumbire, ariko ko ngo aya matungo agiye kubunganira babashe kwihaza mu biribwa.

Uwitwa Gasigwa Israel yabwiye IGIHE ati “Mu by’ukuri hari ubwo umuntu yigunga, ariko iyo abantu nk’aba baje kudusura, twumva tunezerewe, tukarushaho kubona ko tutari twenyine kandi n’igihugu kituzirikana”.

Umukozi ushinzwe imibereho myiza mu Murenge wa Gikomero, Munyaneza Ignace, yashimiye AB Bank, anaboneraho gusaba aba baturage kutazararana n’amatungo bahawe ahubwo bakayitaho ndetse bakazoroza n’abandi.

Yakomeje agira ati “Mwese ndabizi mufite ibikoni, mufite aho kuraza amatungo, ntimuzararane nayo hato mutazarwara amavunja cyangwa ubundi burwayi, ahubwo muzayabyaze umusaruro, aho bizashoboka ndetse muzoroze n’abandi baturanyi, nk’uko AB Bank namwe yaboroje.”

AB Bank ni banki ikorera mu bihugu bitandatu bya Afurika, bitatu byo ku mugabane w’u Burayi ndetse no mu bindi byo muri Aziya yo hagati na Amerika y’Epfo, ikaba izobereye mu gutanga inguzanyo ku mishinga minini, iringaniye ndetse n’imishinga iciriritse.

Mu Rwanda, iyi Banki ifite amashami i Musanze, i Nyamirambo, ku Gisozi, mu Mujyi wa Kigali rwagati ndetse na Kimironko.

Ibi bikorwa byo kwifatanya n’abarokotse Jenoside yakorewe Abatutsi mu 1994 byasorejwe muri Ubumwe Grand Hotel mu mujyi wa Kigali, ahabereye umugoroba wo Kwibuka.

For more information,


Contact us